گرنگترین پڕۆژە کەسییەکان

پێویستە بەر لە دەستبردن بۆ هەر پڕۆژەیەکی دەوروبەرمان ئاگامان لە پرۆژەکانی خودی خۆمان بێت، چونکە لە دواڕۆژدا ئێمە بەرپرسیارین لەسەرجەم کارو پڕۆژەکانی خۆمان ( كُلُّ نَفْسٍ بِمَا كَسَبَتْ رَهِينَةٌ) المدثر: 38. وە بە تەنهاش لێپێچینەوەمان لەگەڵدا دەکرێ: ( وَكُلُّهُمْ آَتِيهِ يَوْمَ الْقِيَامَةِ فَرْدًا) مريم: 95.
بۆیە پێویستە هەموومان بایەخێکی زۆر چڕوپڕ بدەین بەم پڕۆژە کەسییانەی خوارەوە:
1-گەشەپێدانی عەقڵ بە خوێندنەوە و ئاشنابوون بە بەڵگە و نیشانەکانی یەکتایی و گەورەیی خوای گەورە: (قَدْ جَاءَكُمْ بَصَائِرُ مِنْ رَبِّكُمْ فَمَنْ أَبْصَرَ فَلِنَفْسِهِ وَمَنْ عَمِيَ فَعَلَيْهَا وَمَا أَنَا عَلَيْكُمْ بِحَفِيظٍ) الأنعام: 104.
2-گەشەپێدانی جەستە بە کاراکردنی ئەندامانی جەستە و ئەنجامدانی کارو پڕۆژەی چاك و بەسوود: (مَنْ عَمِلَ صَالِحًا فَلِنَفْسِهِ) فصلت: 46.
3-گەشەپێدان و پاککردنەوەی دڵ و دەروون: (وَمَنْ تَزَكَّى فَإِنَّمَا يَتَزَكَّى لِنَفْسِهِ) فاطر: 18.
4-گەشەپێدانی هەست و نەستەکان بە دەربڕینی سوپاسگوزاری لەسەر سەرجەم دەستکەوتەکان: (وَمَنْ شَكَرَ فَإِنَّمَا يَشْكُرُ لِنَفْسِهِ) النمل: 40.
5-گەشەپێدانی هێز و تواناکان بە تێکۆشانی بێ وچان بۆ زاڵبوون بەسەر دوژمنی دەر و دەروون: (وَمَنْ جَاهَدَ فَإِنَّمَا يُجَاهِدُ لِنَفْسِهِ) العنكبوت: 6.
6-گەشەپێدانی مێشك و ئەندێشە بۆ دۆزینەوەی ڕاستییەکان و گرتنەبەری ڕێگاکانیان: (فَمَنِ اهْتَدَى فَإِنَّمَا يَهْتَدِي لِنَفْسِهِ) يونس: 108.
7-گەشەپێدانی ماڵ و سامان و هێزی بەخشندەیی بە خۆپاراستن و دوورکەوتنەوە لە ڕەزیلی و پیسکەیی و چروکی: (وَمَنْ يَبْخَلْ فَإِنَّمَا يَبْخَلُ عَنْ نَفْسِهِ) محمد: 38.
8-گەشەپێدانی پەیوەندییەکان بە خۆپاراستن لە بێبەڵێنی و هەڵوەشاندنەوەی پەیمان و ڕێکەوتنەکان: (فَمَنْ نَكَثَ فَإِنَّمَا يَنْكُثُ عَلَى نَفْسِهِ) الفتح: 10.
9-گەشەپێدانی هێزی قەناعەت و ڕازیبوون بەو شتانەی بۆمان حەڵاڵ کراون بە خۆپاراستن لە هەموو جۆرە گوناهێك کە زیان بە ئێستا و دواڕۆژمان دەگەیەنێ: (وَمَنْ يَكْسِبْ إِثْمًا فَإِنَّمَا يَكْسِبُهُ عَلَى نَفْسِهِ) النساء: 111.
10-گەشەپێدانی ماف و ئازادیەکانی خۆمان و دوور کەوتنەوە لە بەزاندنی ماف و ئازادییەکانی خەڵك: (وَلَكِنْ كَانُوا أَنْفُسَهُمْ يَظْلِـمُونَ) العنكبوت: 40.
ئا.محمد سینەمۆکی