باكوڕان پێش هاوسه‌رگیری ئه‌م ڕاستییانه بزانن!
له‌سه‌ره‌تای ژیانی مرۆڤایه‌تییه‌وه هاوسه‌رگیری پیرۆزترین په‌یوه‌ندی نێوان مرۆڤه‌كان بووه‌و باڵاترین و شكۆدارترین په‌یوه‌ندی نێوان هه‌ردوو ره‌گه‌زه (نێرو مێ)، هاوسه‌رگیری ئاسووده ئه‌و هاوسه‌رگیرییه‌یه له‌سه‌ر بنه‌مای رێزو خۆشه‌ویستی و سوكنایی و مه‌وه‌ده‌ت و سۆزو به‌زه‌یی و دڵنیایی درووست ده‌بێت، ئه‌م په‌یوه‌ندییه چه‌ندین پێوه‌رو مه‌رجی مه‌حكه‌م و پته‌و له‌خۆ ده‌گرێت تا پارێزراوو به‌رده‌وامو سه‌ركه‌وتووبێت.
لێره‌دا ئاماژه به‌سه‌ردێڕی چه‌ند په‌یامێكی كورت ده‌ده‌ین بۆكوڕان تا پێش پرۆسه‌ی هاوسه‌رگیری ڕه‌چاوی بكه‌ن و به‌هێندی وه‌رگرن و دوای هاوسه‌رگیریش كاری له‌سه‌ر بكه‌ن بیكه‌نه رێسای ژیانی خێزانییان:
- باپێوه‌رو مه‌رجی سه‌ره‌كیت بۆ هاوسه‌رگیری دینداری و ره‌وشت به‌رزی بێت و هه‌رگیز سازشی له‌سه‌ر نه‌كه‌یت چونكه ئه‌نجامه‌كه‌ی شكست وپه‌شیمانییه.
- بزانه خانمی ته‌واوو بێخه‌وش و هه‌ڵه‌و په‌ڵه بوونی نییه.
- باپێگه‌ی كۆمه‌ڵایه‌تی و ئاستی زانستی و رۆشنبیریتان لێكه‌وه نزیك بێت.
- ماڵئاواییی له‌ژیانی ره‌به‌نی بكه‌و وه‌ك قۆناغی كوڕێنی هه‌ڵسووكه‌وت مه‌كه به‌رپرسیارێتی خێزانی له‌ئه‌ستۆ بگره‌و بیكه‌ره یه‌كه‌مه‌یاتییه‌كانی ژیانت..
- بۆشایی دایباب و خانه‌واده بۆ هاوژینه‌كه‌ت پڕكه‌ره‌وه له‌رووی هه‌ست و سۆزو خۆشه‌ویستی و نازه‌وه.
- ره‌چاوكردنی هاوژینه‌كه‌ت له‌رووی ده‌روونی و لاشه‌ییه‌وه له‌كاتی سوڕی مانگانه‌و ماوه‌ی منداڵبووندا، خوای گه‌وره‌و میهره‌بان له‌وكاتانه‌دا نوێژو رۆژوو په‌رستشه‌كانی له‌سه‌ر لابردووه، تۆش له‌وكاتانه‌دا یارمه‌تیبده‌و ئه‌ركی گران مه‌كه.
- هاوكاریكردنی هاوژینه‌كه‌ت له‌كارووباری ماڵدا به‌تایبه‌ت له‌كاتی پێویست و دووگیانی و نه‌خۆشیدا.
- سۆزو خۆشه‌ویستی بۆهاوژینه‌كه‌ت ده‌ربڕه‌و هه‌ست و سۆزی ڕابگره.
- ململانێ و مشت و مڕی له‌گه‌ڵدا مه‌كه‌و ده‌ستوه‌ردان له‌كاروباری خانماندا مه‌كه.
- مافه‌كانی بپارێزه‌و پێداویستییه‌كانی بۆ دابینبكه به‌پێی باری دارایی خۆت.
- كاتێك زانیت هه‌ڵه‌ت كردووه به‌خێرایی داوای لێبووردن بكه.
- كاتێك دیاری بكه تا له‌گه‌ڵ هاوژینه‌كه‌ت له‌كه‌ش و هه‌وایه‌كی سازگارو گونجاودا پێكه‌وه گفتوگۆو ده‌رده دڵ بكه‌ن و باسی بیره‌وه‌ری و رۆژانی ته‌مه‌ن بكه‌ن، ئه‌مه‌ش په‌یوه‌ندییه‌كانتان تۆكمه‌و به‌هێز ده‌كات.
- سوپاس و ده‌ستخۆشی لێبكه له‌سه‌ركاره‌كانی تا هه‌ست به‌ره‌زامه‌ندی ده‌روونی بكات و خۆشحاڵ بێت و شانازی بكات كه‌هاوژینی تۆیه.
- هه‌وڵ بده پێكه‌وه بووجه‌ی خێزانی دابنێن.
- لۆجیكانه ئامۆژگاری بكه و ژیرانه په‌یامو بۆچوونه‌كانت بگه‌یه‌نه.
- له‌كاتی گونجاودا گفتوگۆی خێزانی ئه‌نجام بده‌ن و هه‌رگیز فه‌رامۆشی نه‌كه‌ن.
- رێز له‌جیاوازییه‌كانی یه‌كتر بگرن له‌بازنه‌ی شه‌ریعه‌تدا، تا ژیانتان خۆش و چاك بێت، ئه‌و ڕاستییه بزانه هاوسه‌ران جیاوازن به‌هۆی جیاوازی ژینگه‌ی كۆمه‌ڵایه‌تی و رۆشنبیری و كلتوری و ره‌گه‌زییه‌وه.
- هه‌وڵ مه‌ده هاوژینه‌كه‌ت بگۆڕیت چونكه كارێكی ئه‌سته‌مه‌و ناكرێت، به‌ڵام ده‌كرێت كاردانه‌وه‌كانت بگۆڕیت ئه‌مه‌ش واده‌كات هاوژینه‌كه‌شت كاردانه‌واكانی بگۆڕێت به‌و شێوه ژیان ئاسایی و جوان ده‌بێت و خۆت به‌كاری نه‌كرده‌وه خه‌ریك ناكه‌یت.
- نهێنی ژیانی خێزانیت بپارێزه‌و بوار مه‌ده كه‌س ده‌ست وه‌ردان بكات له‌كارووباری خێزانیت.
- بوار به‌خۆت و هاوسه‌ره‌كه‌ت بده بۆ ئه‌وه‌ی ڕابێن و بگونجێن و ده‌ست و په‌نجه نه‌رمكه‌ن له‌گه‌ڵ و ڕۆڵ و به‌رپرسیارێتی ژیانی خێزانی، ئه‌مه‌ش پێویستی به‌ئارامگرتن و خۆڕاگری و كات هه‌یه.
- ئه‌رك وبه‌رپرسیارێتی و ڕۆڵی خۆت وه‌ك پیاوو باوك به‌جوانی بگێڕه.
- هه‌واڵی خزم و كه‌سووكاری خاتوونه‌كه‌ت بپرسه و رێزیان لێبگره.
- خاتوونه‌كه‌ت به‌راورد مه‌كه به‌هیچ ژنێكی تر.
- خاتوونه‌كه‌ت تێبگه‌یه‌نه بابه‌پێی باری داراییتان هه‌ڵسووكه‌وت بكات.
- بوونی كێشه‌ی خێزانی ئاساییه‌و له‌هه‌موو خێزانه‌كاندا رووده‌دات و ژیانی خێزانی هه‌ورازو نشێوی تێدایه، به‌ڵام پێویستیت به‌هونه‌ری چاره‌سه‌ركردنی كێشه خێزانییه‌كان هه‌یه دوور له‌ده‌ستوه‌ردانی خانه‌واده‌و ده‌ورووبه‌ر.
- به‌شداری خولێكی هوشیاری خێزانی بكه.
ئا: یاسین ئه‌حمه‌د زه‌نگه‌نه
12-12-2024